സമാപന കര്‍മ്മം
പുരോഹിതന്‍ കൈകള്‍ വിരിച്ചുകൊണ്ട് പാടുന്നു.
പുരോ : കര്‍ത്താവു നിങ്ങളോടുകൂടെ.
ജനം : അങ്ങയോടും കൂടെ.
അനന്തരം പുരോഹിതന്‍ ജനങ്ങളുടെ നേര്‍ക്ക് കൈ നീട്ടിപിടിച്ചുകൊണ്ട് പാടുന്നു.
(കര്‍ത്താവിന്റെ പിറവിത്തിരുനാള്‍)
പുരോ : ദൈവകുമാരന്റെ മര്‍ത്ത്യാവതാരത്താല്‍
പാപാന്ധകാരമകറ്റി മാറ്റി
പുത്രന്റെ ജന്മത്താലിന്നത്തെ നാളിനെ
ദീപ്തമാക്കിത്തീര്‍ത്ത സര്‍വ്വശക്തന്‍
പാപങ്ങള്‍ മായിച്ചു നിങ്ങള്‍തന്‍ ചിത്തത്തില്‍
പാവന ദീപ്തി നിറച്ചിടട്ടെ
ജനം : ആമ്മേന്‍
പുരോ : രക്ഷാകരമായ ദൈവപ്പിറവിതന്‍
അക്ഷയമോദം തരുന്ന വാര്‍ത്ത
വാനവദൂതനാല്‍ പ്രഖ്യാപനം ചെയ്യാന്‍
മാനസത്തിങ്കല്‍ കനിഞ്ഞ ദൈവം
നിങ്ങള്‍ തന്നുള്ളത്തില്‍ തന്റെയാഹ്‌ളാദമാം
മംഗള ചൈതന്യം പൂരിക്കാനും
ആ നല്ല വാര്‍ത്ത പ്രഘോഷണം ചെയ്യാനും
ഏകട്ടെ നിങ്ങള്‍ക്കനുഗ്രഹങ്ങള്‍.
ജനം : ആമ്മേന്‍.
പുരോ : മര്‍ത്യാവതാരത്താല്‍ സ്വര്‍ഗ്ഗവും ഭൂമിയും
കൂട്ടിയിണക്കിയ ദൈവതാതന്‍
പാവന ശാന്തിയും നിസ്തുല സൗഹൃദ
ഭാവവും നിങ്ങള്‍ക്കു നല്‍കുവാനും
സ്വര്‍ഗ്ഗീയ കുട്ടായ്മ തന്നിലെ യംഗങ്ങ-
ളാകുവാനും കൃപയേകിടട്ടെ.
ജനം : ആമ്മേന്‍.
പുരോ : താതനും പുത്രനും പാവനാത്മാവുമാം
നിത്യ കാരുണ്യവാന്‍ സര്‍വ്വശക്തന്‍
തന്‍ ദിവ്യാനുഗ്രഹം നിങ്ങളില്‍ വന്നണ-
ഞ്ഞെന്നെന്നും നിലനില്ക്കുമാറാകട്ടെ
ജനം : ആമ്മേന്‍.
ഡീക്കന്‍/പുരോ: ദിവ്യപൂജ സമാപിച്ചു
ജനം : ദൈവത്തിനു സ്തുതി.
Leave a Reply