ലളിതാ ലെനിന്‍
ജനനം തൃശൂര്‍ ജില്ലയിലെ തൃത്തല്ലൂരില്‍ 1946 ല്‍. തൃത്തല്ലൂര്‍ കമലാ നെഹ്‌റു മെമ്മോറിയല്‍ ഹൈസ്‌കൂള്‍, ഗുരുവായൂര്‍ ലിറ്റില്‍ ഫ്‌ളവര്‍ കോളേജ്, മൂത്തകുന്നം എസ്.എന്‍.എം. ട്രെയിനിംഗ് കോളേജ്, കേരള സര്‍വ്വകലാശാല, മൈസൂര്‍ സര്‍വ്വകലാശാല എന്നിവിടങ്ങളിലായി വിദ്യാഭ്യാസം. രസതന്ത്രത്തിലും, വിദ്യാഭ്യാസത്തിലും ബിരുദങ്ങള്‍, ലൈബ്രറി ആന്റ് ഇന്‍ഫര്‍മേഷന്‍ സയന്‍സില്‍ ബിരുദാനന്തര ബിരുദം. കേരള സര്‍വ്വകലാശാലയുടെ ലൈബ്രറി ആന്റ് ഇന്‍ഫര്‍മേഷന്‍ ഡിപ്പാര്‍ട്ട്‌മെന്റില്‍ 1979 മുതല്‍ 1985 വരെ ലക്ചറര്‍ ആയും തുടര്‍ന്ന് റീഡറായും ജോലി ചെയ്തു. 1990 മുതല്‍ അഞ്ചു വര്‍ഷം ഡിപ്പാര്‍ട്ട്‌മെന്റ് മേധാവി ആയിരുന്നു. 1991 മുതല്‍ 1993 വരെയുള്ള കാലയളവില്‍ കേരള സര്‍വ്വകലാശാല സെനറ്റ് അംഗവുമായിരുന്നു. 1970 കളില്‍ മാതൃഭൂമി ആഴ്ചപ്പതിപ്പില്‍ എഴുതി മലയാള കാവ്യരംഗത്തേക്ക് കടന്നു വന്നു. 1976 ല്‍ പ്രസിദ്ധികൃതമായ 'കരിങ്കാളി'യാണ് ആദ്യ കവിതാ സമാഹാരം. കവി, ബാലസാഹിത്യകാരി എന്നിവയ്‌ക്കൊപ്പം, സാമൂഹ്യ പ്രവര്‍ത്തക, പ്രാസംഗിക, ഫെമിനിസ്റ്റ് എഴുത്തുകാരി എന്നീ നിലകളിലും അറിയപ്പെടുന്ന എഴുത്തുകാരിയാണ് ലളിതാ ലെനിന്‍. ഭര്‍ത്താവ് എഴുത്തുകാരനും സ്ഥലനാമസമിതിയുടെ ഭാരവാഹിയുമായിരുന്ന കെ.എം.ലെനിന്‍.
കൃതികള്‍
കരിങ്കാളി (കവിതാ സമാഹാരം).
കര്‍ക്കിടകവാവ് (കവിതാ സമാഹാരം). പരിധി പബ്‌ളിക്കേഷന്‍സ്, 1995
നമുക്ക് പ്രാര്‍ത്ഥിക്കാം (കവിതാ സമാഹാരം), ഡി.സി.ബുക്‌സ്, 2000
മിന്നു (കുട്ടികള്‍ക്കുള്ള നോവല്‍). ബാലസാഹിത്യ ഇന്‍സ്റ്റിറ്റ്യൂട്ട്, 1984.
കടല്‍ (ബാലസാഹിത്യം, കവിതകള്‍). ബാലസാഹിത്യ ഇന്‍സ്റ്റിറ്റ്യൂട്ട്, 2000
ഭൂദൈവങ്ങള്‍ (ഖലീല്‍ ജിബ്രാന്‍ കൃതികളുടെ പരിഭാഷ). ഡി.സി. ബുക്‌സ്, 2000.
Leave a Reply