Tag archives for തെയ്യാട്ടം
തെയ്യംകൂടല്‍
തെയ്യാട്ടം നടത്തുന്ന കാവിലോ, തറവാട്ടിലോ കോലക്കാരന്‍ തലേദിവസം വന്ന് പടഹാദിയായി ചടങ്ങുകള്‍ ആരംഭിക്കും. ഇതിന് 'തെയ്യംകൂടല്‍'എന്നാണ് പറയുക. തെയ്യം കൂടിയാല്‍ നാട്ടുകാര്‍ വീട് വൃത്തിയാക്കി വിളക്കു വയ്ക്കും.
കന്നിക്കെട്ട്
കരിമ്പാലര്‍ക്കിടയില്‍ നിലവിലുള്ള ഒരനുഷ്ഠാനകലാപ്രകടനം. തെയ്യാട്ടത്തോടനുബന്ധിച്ചാണ് കന്നികെട്ട് നടത്തുക. കരിമ്പാലരുടെ മുഖ്യ ആരാധ്യദേവത ചീര്‍മയാണ്. ചീര്‍മയെക്കുറിച്ചുള്ള ദീര്‍ഘമായ ഗാനം അവര്‍ പാടും. ആ പാട്ടില്‍ ഏഴു കന്നിമാരെ (ശ്രീമഹാദേവന്റെ പുത്രിമാരായ ദേവതകള്‍) ക്കുറിച്ച് പരാമര്‍ശിക്കുന്നുണ്ട്.
കനലാട്ടം
അനുഷ്ഠാനപരമായ അഗ്നിനൃത്തമാണ് കനലാട്ടം. തീയാട്ട്, തിറയാട്ടം, തെയ്യാട്ടം, കോമരാട്ടം മുതലായവയില്‍ കനലാട്ടം പതിവുണ്ട്. അയ്യപ്പന്‍ തീയാട്ടില്‍ കനലാട്ടം എന്ന രംഗമുണ്ട്. പ്‌ളാവിറക് മൂന്നു സ്ഥലത്ത് കൂട്ടി കനലാക്കും; പിന്നീട് ആ കനലിലാണ് കോമരമിളകി നൃത്തം ചെയ്യുന്നത്.
അലര്‍ച്ച
കലാപ്രകടനങ്ങളിലും മറ്റും വേഷങ്ങളോ, കോലങ്ങളോ പുറപ്പെടുവിക്കുന്ന പ്രത്യേകതരത്തിലുള്ള ശബ്ദം. കൂടിയാട്ടം, കഥകളി എന്നിവയില്‍ മാത്രമല്ല, തെയ്യാട്ടം, തിറയാട്ടം, തുടങ്ങിയ നാടന്‍കലകളിലും അനുഷ്ഠാന നിര്‍വ്വഹണങ്ങളിലും അലര്‍ച്ചകളും അട്ടഹാസങ്ങളും കേള്‍ക്കാം.