ഒക്ടോബര് 17ന് ലണ്ടനില്‍ പ്രഭാഷണപരമ്പരയ്ക്ക് തുടക്കം
110 ദിവസം നീണ്ടുനില്‍ക്കുന്ന കെഎംബി പ്രദര്‍ശനങ്ങള്‍ക്കും പരിപാടികള്‍ക്കുമായി മട്ടാഞ്ചേരിയിലെ ബിനാലെ ടീം വേഗത്തില്‍ ഒരുങ്ങുകയാണ്. കലാസൃഷ്ടികളുടെ നിര്‍മ്മാണത്തിലും ഇന്‍സ്റ്റലേനിലും ടീമിനെ സഹായിക്കാനും ബിനാലെയുടെ സുഗമമായ നടത്തിപ്പ് ഉറപ്പാക്കുന്നതിനും ഫൗണ്ടേഷനെ പിന്തുണയ്ക്കാന്‍ വിദ്യാര്‍ഥികളുടെ സംഘവും എത്തുന്നുണ്ട്. ബാച്ചിലേഴ്‌സ് ബിരുദമെങ്കിലും ഉള്ളവരും, ഇംഗ്ലീഷ് ഭാഷയില്‍ പ്രാവീണ്യമുള്ളവരും, ഒക്ടോബര് മുതല്‍ 2026 ഏപ്രില്‍ വരെ കുറഞ്ഞത് 60 ദിവസത്തെ മുഴുവന്‍സമയ ജോലിയില്‍ ഏര്‍പ്പെടാന്‍ കഴിവുള്ളവരുമായ അപേക്ഷകരെ സ്വാഗതം ചെയ്യുന്നു. താല്‍പ്പര്യമുള്ളവര്‍, സിവിയും ഒരു ചെറിയ ആമുഖവും careers@kochimuzirisbiennale.org എന്ന വിലാസത്തില്‍ ഇമെയില്‍ ചെയ്യുക.
ഡര്‍ജോയ് ബംഗ്ലാദേശ് ഫൗണ്ടേഷനുമായും കൊച്ചി-മുസിരിസ് ബിനാലെയുമായും സഹകരിച്ച് ഹേവാര്‍ഡ് ഗാലറി അവതരിപ്പിക്കുന്ന ‘ന്യൂ ഡയലോഗ്‌സ്: കണ്ടംപററി ആര്‍ട്ട് ഫ്രം സൗത്ത് ഏഷ്യ’ എന്ന പ്രഭാഷണ പരമ്പരയുടെ രണ്ടാം പതിപ്പായ ‘ഡിബിഎഫ്‌കെഎംബി’ പ്രഭാഷണ പരമ്പര ഒക്ടോബര് 17 ന് ഉച്ചകഴിഞ്ഞ് ലണ്ടനിലെ ക്വീന്‍ എലിസബത്ത് ഹാളിലെ പര്‍സെല്‍ റൂമില്‍ നടക്കും. കെഎംബിയുടെ ആറാം പതിപ്പിനായുള്ള തന്റെ സമീപനത്തെക്കുറിച്ചുള്ള ഒരു സെഷന്‍ നിഖില്‍ ചോപ്ര നയിക്കും. എഴുത്തുകാരി കാമില ഷംസിയുടെ മുഖ്യ പ്രഭാഷണത്തോടെ ദിവസം അവസാനിക്കും. അബ്ദുള്‍ ഹാലിക് അസീസ്, സുബാഷ് തേബെ ലിംബു, സഹ്റ മല്‍കാനി (കറാച്ചി ലാ ജാമിയ), ഹിറ്റ് മാന്‍ ഗുരുങ്, ജിതീഷ് കല്ലത്ത്, പല്ലവി പോള്‍, ഷീലാഷ രാജ്ഭണ്ഡാരി എന്നിവരാണ് മറ്റ് പ്രഭാഷകര്‍. പാനല്‍ ചര്‍ച്ചകള്‍ മാരിയോ ഡിസൂസയും കെഎംബിഎഫിന്റെ ഇന്റര്‍നാഷണല്‍ പാര്‍ട്ണര്‍ഷിപ്പ് ആന്‍ഡ് പ്രോഗ്രാമുകള്‍ക്ക് നേതൃത്വം നല്‍കുന്ന ഡോ. ശ്വേതല്‍ പട്ടേലും മോഡറേറ്റര്‍ ആയിരിക്കും.
സെപ്റ്റംബറില്‍ ഔട്ട്റീച്ച് പരിപാടി പുനരാരംഭിച്ചു. കൊച്ചി ബിനാലെ ഫൗണ്ടേഷന്റെ പ്രോഗ്രാം ഡയറക്ടര്‍ നിഖില്‍ ചോപ്രയും മാരിയോ ഡിസൂസയും വടക്കന്‍ കേരളത്തിലെ നാല് വേദികളിലെത്തി- കാസര്‍ഗോഡുള്ള സെന്‍ട്രല്‍ യൂണിവേഴ്‌സിറ്റി ഓഫ് കേരള, കണ്ണൂരിലെ മഹാത്മാ മന്ദിരം, വയനാട് മാനന്തവാടിയിലെ കേരള ലളിതകലാ അക്കാദമി ആര്‍ട്ട് ഗാലറി, കോഴിക്കോട്ടെ വി കെ കൃഷ്ണമേനോന്‍ മ്യൂസിയം തിയേറ്റര്‍ എന്നിവിടങ്ങളില്‍. കേരള കേന്ദ്ര സര്‍വകലാശാലയിലെ ഇംഗ്ലീഷ് സാഹിത്യ വകുപ്പ്, കണ്ണൂരിലെ ഗാലറി ഏകാമി, ലളിതകലാ അക്കാദമി, ഉറവ് ഇക്കോ ലിങ്കുകള്‍, മാതൃഭൂമി പബ്ലിഷിംഗ് ലിമിറ്റഡ്, മ്യൂസിയം ആന്‍ഡ് സൂ വകുപ്പ്, ആവണി ഇന്‍സ്റ്റിറ്റ്യൂട്ട് ഓഫ് ഡിസൈന്‍ തുടങ്ങിയ നിരവധി സ്ഥാപനങ്ങള്‍ സഹകരിച്ചാണ് ലെറ്റ്‌സ് ടോക്ക് സെഷനുകള്‍ സാധ്യമായത്.
ആര്‍ട്ട് ബൈ ചില്‍ഡ്രന്‍ (എബിസി) പ്രോഗ്രാം അടുത്തിടെ, 14 പുതിയ ആര്‍ട്ട് ഫെസിലിറ്റേറ്റര്‍മാര്‍ക്കായി ആദ്യ ഓറിയന്റേഷന്‍ വര്‍ക്ക്ഷോപ്പ് നടത്തി. എറണാകുളം, തൃശൂര്‍, ആലപ്പുഴ, പാലക്കാട് ജില്ലകളിലെ സര്‍ക്കാര്‍ സ്‌കൂളുകളിലായി ഈ പതിപ്പില്‍ ആറ് ആര്‍ട്ട് റൂമുകള്‍ക്ക് കോഹോര്‍ട്ട് നേതൃത്വം നല്‍കും. ആലുവയിലെ ശാന്തിഗിരി ആശ്രമത്തിന്റെ കാമ്പസില്‍ നടന്ന വര്‍ക്ക്ഷോപ്പ്, പ്രോഗ്രാം ലീഡ് ബ്ലെയ്സ് ജോസഫും പ്രോഗ്രാം അസോസിയേറ്റായ നീതു കെ.എസും നയിച്ചു. കളിമണ്‍ മോഡലിംഗ്, കണ്ടെത്തിയ വസ്തുക്കള്‍ ഉപയോഗിച്ച് സൗണ്ട്സ്‌കേപ്പുകള്‍ സൃഷ്ടിക്കല്‍ തുടങ്ങിയ ടീം-ബില്‍ഡിംഗ് പ്രവര്‍ത്തനങ്ങളിലൂടെയാണ് ഇത് വികസിച്ചത്.
സെപ്റ്റംബര്‍ അവസാന വാരത്തില്‍, കണ്ണൂര്‍ ജില്ലയിലെ കതിരൂര്‍ ഗ്രാമത്തില്‍, പ്രാദേശിക ഗ്രാമപഞ്ചായത്തുമായി സഹകരിച്ച് ഒരു എബിസി ആര്‍ട്ട് റൂം വര്‍ക്ക്ഷോപ്പിനും ജോസഫ് നേതൃത്വം നല്‍കി. 30 വിദ്യാര്‍ത്ഥികളുടെയും അധ്യാപകരുടെയും പഞ്ചായത്ത് ഉദ്യോഗസ്ഥരുടെയും പങ്കാളിത്തത്തോടെ ഗവണ്‍മെന്റ് ഹയര്‍ സെക്കന്‍ഡറി സ്‌കൂളിലാണ് വര്‍ക്ക്ഷോപ്പ് നടന്നത്. ഡിസംബറില്‍ ബിനാലെ ആര്‍ട്ട് റൂമില്‍ പ്രദര്‍ശിപ്പിക്കുന്ന കലാസൃഷ്ടികള്‍ അവര്‍ ഒരുമിച്ച് നിര്‍മ്മിച്ചു.
ഈ പതിപ്പില്‍, ഫോര്‍ട്ട് കൊച്ചി, മട്ടാഞ്ചേരി, എറണാകുളം എന്നിവിടങ്ങളില്‍ പുതിയ കവാടങ്ങള്‍ തുറക്കും, അവ വളരെക്കാലമായി പരിചിതമായ കോട്ടകള്‍ക്ക് അപ്പുറത്തേക്ക് നീങ്ങുന്നു. തേയില, സുഗന്ധവ്യഞ്ജനങ്ങള്‍, കയര്‍ എന്നിവയുടെ സുഗന്ധം നിറഞ്ഞ വെയര്‍ഹൗസുകള്‍, സ്മാരക പ്രാധാന്യമുള്ള, ചരിത്രങ്ങള്‍ക്ക് സാക്ഷ്യം വഹിച്ച പൈതൃക ഘടനകള്‍ എന്നിവയാണ് ഇവ.