പുതിയ ഭൂപടങ്ങള്‍

ഹിന്ദുസ്ഥാന്‍ ടൈംസിന്റെ ഒപീനിയന്‍ എഡിറ്ററും എഴുത്തുകാരനുമായ അമൃത് ലാലിന്റെ ലേഖന സമാഹാരമാണ് പുതിയ ഭൂപടങ്ങള്‍. കവര്‍: റിയാസ് കോമു. മുപ്പതിലധികം വര്‍ഷമായി ഇന്ത്യന്‍ രാഷ്ട്രീയത്തെ അടുത്തുനിന്ന് നിരീക്ഷിക്കുന്ന അമൃത് ലാല്‍ മുപ്പത്തിയേഴ് ലേഖനങ്ങളിലൂടെ നരേന്ദ്ര മോദി സര്‍ക്കാരിന്റെ ആദ്യ അഞ്ചുവര്‍ഷങ്ങളെ വിശകലനം ചെയ്യുന്നു. എഴുത്തുകാരന്‍ ആനന്ദിന്റേതാണ് അവതാരിക.

മതേതരത്വത്തോടും ജനാധിപത്യത്തോടുമാണ് അമൃത് ലാലിന്റെ പ്രതിബദ്ധത.

പശു ഒരു മൃഗം മാത്രമല്ല എന്ന ലേഖനത്തില്‍ നിന്ന് ഒരുഭാഗം ഇങ്ങനെ:

അഖ്‌ലാഖ് കൊല്ലപ്പെട്ട ബിസാറയില്‍ ആ കൊലപാതകത്തിനു ശേഷം ഒരു മുസ്ലിം കുടുംബത്തില്‍ വിവാഹം നടന്നു. വരന്റെ കുടുംബക്കാര്‍  വിവാഹംവേണ്ട എന്നുവയ്ക്കാന്‍ ഒരുങ്ങി. ഗ്രാമപ്രധാന്റെ നേതൃത്വത്തില്‍ ഒരുപറ്റം ഹിന്ദുക്കള്‍ അവരെ സന്ദര്‍ശിച്ചു. വിവാഹം നടന്നില്ലെങ്കില്‍ ഗ്രാമത്തിന്റെ അഭിമാനം തകരുമെന്നും, തങ്ങളുടെ നേതൃത്വത്തില്‍ എല്ലാ സംരക്ഷണവും ഉറപ്പുവരുത്തി വിവാഹം നടത്തിക്കൊള്ളാമെന്നും അവര്‍ പറഞ്ഞു. ആ ഉറപ്പില്‍ മാധ്യമ ശ്രദ്ധ ആകര്‍ഷിക്കാതെ ബിസാറയിലെ ഠാക്കൂറുകളുടെ നേതൃത്വത്തില്‍ വിവാഹം ഭംഗിയായി നടന്നു. ഇന്നേവരെ വര്‍ഗീയകലാപമുണ്ടാകാത്ത തങ്ങളുടെ ഗ്രാമത്തിന്റെ മുറിവുണക്കാനുള്ള ശ്രമമായിട്ടാണ് വിവാഹം വിശേഷിപ്പിക്കപ്പെട്ടത്. ബദല്‍ രാഷ്ട്രീയത്തിന്റെ പ്രഭാവം അങ്ങനെ ബിസാറയില്‍ തന്നെ നമുക്ക് കാണാവുന്നതാണ്.”