ആണ്ടുവട്ടത്തിലെ ഞായര്‍-_6
സ്വര്‍ഗ്ഗീയ പെസഹായുടെ അച്ചാരം
ആണ്ടുവട്ടത്തിലെ ഞായറാഴ്ചകളില്‍ ഉപയോഗിക്കുന്നത്
സര്‍വ്വേശ്വരാ നിത്യനായുള്ള ദൈവമേ
സര്‍വ്വശക്താ പരിശുദ്ധ താതാ
ക്രിസ്തുനാഥന്‍വഴി എങ്ങുമെന്നേരവും
ഭക്തിയോടങ്ങേക്കു നന്ദിചൊല്ലാം
യുക്തവും ന്യായവുമാണതു ഞങ്ങള്‍ക്കു
രക്ഷാകരവും ജഗല്‍പിതാവേ.
അങ്ങയിലാണല്ലോ ഞങ്ങള്‍തന്‍ ജീവിതം
കര്‍മ്മങ്ങളസ്തിത്വമെന്നിതെല്ലാം
ഈ ലോക യാത്ര നടത്തുമീ ഞങ്ങളെ
പാലനം ചെയ്യുന്നതങ്ങു തന്നെ
നിത്യസൗഭാഗ്യ വാഗ്ദാനത്താല്‍ ഞങ്ങള്‍ക്കു
ശക്തിയും ധൈര്യവും നല്‍കിടുന്നു.
ക്രിസ്തുവെ മൃത്യു വരിച്ചോരില്‍ നിന്നേവ-
മുത്ഥാനം ചെയ്യിച്ച പാവനാത്മാ
നല്‍കും പ്രഥമ ഫലം സ്വീകരിച്ചോരാം
ഞങ്ങള്‍ക്കും സ്വര്‍ഗ്ഗീയമാം പെസഹാ
ഭംഗമെന്ന്യേനിത്യം കൊണ്ടാടുവാനുള്ള
ഭാഗ്യവും നല്‍കുമെന്നാശിക്കുന്നു.
ആകയാലാമോദവായ്‌പോടെ നിത്യവും
നാകദൂതന്‍മാരാം ഗായകന്‍മാര്‍
ദിവ്യപ്രതാപവാനങ്ങയെ വാഴ്ത്തുന്നു
മംഗളംപാടി വണങ്ങിടുന്നു.
ആ ദിവ്യഗാനത്തൊടൊന്നിച്ചു ഞങ്ങളും
ആലപിച്ചീടുന്നു താഴ്മയോടെ (2)
Leave a Reply