പ്രശസ്ത ബാലസാഹിത്യകാരനാണ് പി. നരേന്ദ്രനാഥ്. ജനനം 1934ല്‍ പാലക്കാട്ടെ പട്ടാമ്പിക്കടുത്ത് നെല്ലായ എന്ന ഗ്രാമത്തില്‍. രാഷ്ട്രീയപ്രവര്‍ത്തകനും ഇന്‍ഷുറന്‍സ് ഏജന്റുമായിരുന്ന എം.കെ. നമ്പൂതിരിയാണ് പിതാവ്. പൂമരത്തില്‍ കുഞ്ഞിക്കുട്ടി കോവിലമ്മ മാതാവ്. മുത്തശ്ശി കുഞ്ഞിക്കാവു കോവിലമ്മയില്‍ നിന്ന് ചെറുപ്പത്തിലേ നരേന്ദ്രനാഥിന് സാഹിത്യവാസന ലഭിച്ചു. വിദ്യാഭ്യാസം തൃശൂരിലായിരുന്നു. സാമ്പത്തിക ബുദ്ധിമുട്ടുകള്‍ കാരണം കലാലയ വിദ്യാഭ്യാസം പൂര്‍ത്തിയാക്കുവാന്‍ കഴിഞ്ഞില്ല. പത്തൊമ്പതാം വയസ്സില്‍ കൊച്ചിന്‍ കമേഴ്‌സ്യല്‍ ബാങ്കില്‍ ഗുമസ്തനായി. സ്വപരിശ്രമം കൊണ്ട് ധനശാസ്ത്രം, ബാങ്കിംഗ് എന്നിവയില്‍ വിജ്ഞാനവും ബിരുദങ്ങളും നേടി. 1963 മുതല്‍ കാനറാ ബാങ്കില്‍ ജോലി ചെയ്തു.
ആദ്യകൃതിയായ നുറുങ്ങുന്ന ശൃംഖലകള്‍ 18 വയസ്സില്‍ പ്രസിദ്ധീകരിച്ചു. ആദ്യത്തെ ബാലസാഹിത്യകൃതി വികൃതിരാമനായിരുന്നു. ഇതിന് കേരള സാഹിത്യ അക്കാദമിയുടെ അവാര്‍ഡ് ലഭിച്ചു. കുഞ്ഞിക്കൂനന്‍ എന്ന ബാലസാഹിത്യ ഗ്രന്ഥത്തിന് കേന്ദ്ര വിദ്യാഭ്യാസ വകുപ്പ് അവാര്‍ഡും അന്ധഗായകന് സാഹിത്യ പ്രവര്‍ത്തക സഹകരണ സംഘം പുരസ്‌കാരവും ലഭിച്ചു. വികൃതിരാമന്‍, കുഞ്ഞിക്കൂനന്‍, അന്ധഗായകന്‍ എന്നീ കൃതികള്‍ക്ക് ഹിന്ദി, തമിഴ് പരിഭാഷകള്‍ ഉണ്ടായിട്ടുണ്ട്. നോവലുകളും നാടകങ്ങളും ബാലസാഹിത്യവുമായി 30ല്‍ പരം കൃതികളുടെ കര്‍ത്താവ്. 1991 നവംബര്‍ 3നു അന്തരിച്ചു.

കൃതികള്‍

    നുറുങ്ങുന്ന ശൃംഖലകള്‍ (നാടകം)
    പറയിപെറ്റ പന്തിരുകുലം

ബാലസാഹിത്യം

    കുഞ്ഞിക്കൂനന്‍
    വികൃതിരാമന്‍
    അന്ധഗായകന്‍
    ഉണ്ടത്തിരുമേനി